Allt að gerast Liðin ganga inn á völlinn, Stjarnan í sínum bláu búningum og FH í hvítu. Allt eins og það á að vera.

Spáð í spilin Hafrún Rakel spáði fyrir þessari umferð í Bestu deildinni

Stjarnan 1 - 2 FH
Bæði lið að ströggla aðeins í byrjun tímabils en FH eru með tvær hitasjúkar, Valgerði og Helenu Ósk sem munu gera gæfumuninn í þessum leik. 2-1 fyrir FH með mörkum frá þeim báðum.

Byrjunarliðin Kristján gerir tvær breytingar á sínu liði frá tapinu gegn Blikum. Inn koma Úlfa Dís og Hulda Hrund og Henríetta og Hrafnhildur Salka fá sér sæti á bekknum.

Bræðurnir gera sömuleiðis tvær breytingar á sínu liði frá síðasta leik en Andrea Rán tekur út leikbann í dag og þá fær Selma Sól sér sæti á bekknum. Inn fyrir þær koma Margrét Brynja og Ída Marín en þetta er fyrsti leikur ídu fyrir FH en hún var fengin frá Völsurum fyrir tímabilið. Hún stundar nám í Bandaríkjunum og er líklega nýkomin þaðan og fer beint í liðið.

Dómarateymið Með flautuna í dag er Breki Sigurðsson og honum til halds og trausts eru AD1, Sigurður Þór Sveinsson, og AD2, Milan Djurovic. Eftirlitsmaður er Sigursteinn Árni Brynjólfsson og varadómari er Ágúst Hjalti Tómasson.
Breki Sigurðsson, hér lengst til vinstri.

Upp og ofan hjá fimleikafélaginu FH byrjaði mótið á Króknum þar sem þær sóttu góð 3 stig. Í næsta leik fengu þær Þór/KA í heimsókn og endaði sá leikur 0-4 þar sem Sandra María lék á als oddi og setti öll fjögur. Þar á eftir töpuðu þær sannfærandi 3-0 gegn Blikum í Kópavoginum en náðu síðan sigri á heimavelli gegn Þrótturum í síðasta leik þar sem sigurmarkið kom á 7. mínútu í uppbótartíma en Breukelen Woodard skoraði það. Fjórar ólíkar frammistöður hja þeim í fyrstu fjórum leikjunum og leitast þær væntanlega eftir því í dag að tengja saman sigra og ná ákveðnum stöðugleika i sinn leik.
Breukelen skoraði sigurmark FH í síðasta leik.

Erfið byrjun heimakvenna Stjörnukonur eru aðeins komnar með 3 stig á töfluna eftir fyrstu fjórar umferðirnar en þau sóttu þær til Keflavíkur í endurkomusigri eftir að hafa lent 2-0 undir. Það gefur augaleið að 3 stig eftir fjórar umferðir er rýr uppskera og þurfa Stjörnukonur að fara að gefa í. Ég vænti þess að þær vilji bæta upp fyrir arfaslaka frammistöðu í síðasta leik þegar Blikar fóru illa með þær í 5-1 sigri þeirra grænklæddu en þær voru komnar í 5-1 strax eftir 39 mínútur, það verður gaman að sjá hvernig þær svara fyrir það.

Velkomin á Samsung Kæru lesendur, verið hjartanlega velkomin í beina textalýsingu frá leik Stjörnunnar og FH í 5. umferð Bestu deildarinnar.