Spá Fótbolta.net - 10. sæti: Fylkir

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. Fylkir 19 stig
11. Víkingur R. 18 stig
12. Keflavík 15 stig

Um liðið: Árbæingar féllu úr Pepsi-deildinni árið 2016 eftir að hafa verið næstlengst í efstu deild samfleytt af öllum liðum sem þar eru. Fylkismenn sneru bökum saman í fyrra, unnu Inkasso-deildina og spila aftur á meðal þeirra bestu í ár.

Þjálfari - Helgi Sigurðsson: Helgi fór upp með Fylki í fyrra á sínu fyrsta ári sem aðalþjálfari. Helgi hafði áður verið aðstoðarþjálfari hjá Víkingi R. sem er einmitt fyrsti andstæðingur Fylkis í Pepsi-deildinni í sumar. Helgi átti farsælan feril sem framherji á sínum tíma en hann lék bæði heima sem og erlendis með liðum eins og Panathinaikos, AGF og Stabæk. Þá skoraði Helgi tíu mörk í 62 leikjum með íslenska landsliðinu á ferli sínum.

Ná Fylkismenn að halda flugi?

Styrkleikar: Fylkismenn hafa byggt upp á öflugum kjarna af heimamönnum sem þekkja hvorn annan inn og út og Fylkishjartað í liðinu er mjög stórt. Árangurinn í fyrra var góður og Fylkismenn koma fullir sjálfstrausts inn í mótið eftir að hafa átt góðu gengi að fagna á undirbúningstímabilinu einnig. Fylkir skoraði 50 mörk í Inkasso-deildinni í fyrra og sóknarleikur liðsins ætti að verða öflugur í sumar með Albert Brynjar Ingason í broddi fylkingar.

Veikleikar: Fylkismenn hafa haft nokkuð hægt um sig á leikmannamarkaðinum í vetur og spurning er hvort að búið sé að styrkja hópinn nægilega mikið fyrir Pepsi-deildina. Þar sem verið er að leggja gervigras á Fylkisvöll þá spila Árbæingar fyrstu heimaleiki sína í sumar á Eimskipsvellinum í Laugardal. Það gæti sett strik í reikninginn að spila fyrstu heimaleikina á hlutlausum velli. Varnarlínan og markvarslan var í fínu lagi í fyrra en þar eru nokkrir leikmenn sem eru óreyndir í Pepsi-deildinni og spurning er hvernig þeim tekst til í sumar.

Lykilmenn: Albert Brynjar Ingason og Ásgeir Börkur Ásgeirsson. Albert skoraði fjórtán mörk í Inkasso-deildinni í fyrra og kemur hungraður aftur í Pepsi-deildina. Ásgeir Börkur er fyrirliði Fylkis en hann var valinn bestur í Inkasso-deildinni í fyrra.

Gaman að fylgjast með: Orri Sveinn Stefánsson er ungur varnarmaður sem fær eldskírn sína í Pepsi-deildinni í sumar. U21 árs landsliðsmaður sem var valinn í lið ársins í Inkasso-deildinni í fyrra.

Spurningamerkið: Stemningin í Árbænum er góð og Fylkir hefur tapað fáum leikjum síðan Helgi tók við. Nú er liðið komið á stóra sviðið og stóra spurningamerkið er hvernig því gengur að kljást við bestu lið landsins.

Völlurinn: Það er létt yfir lautarferð segir í laginu en lautin í Árbænum hefur tekið stakkaskiptum undanfarin ár. Glæsileg stúka er nú á svæðinu og verið er að leggja gervigras á völlinn sjálfan. Fylkir verður því með glæsilega keppnis og æfingaaðstöðu á aðavelli sínum allt árið um kring.

„Ætlum okkur að vera ofar en þetta"

Þjálfarinn segir - Helgi Sigurðsson
„Við erum nýliðar og þeim er gjarnan spáð neðarlega. Miðað við úrslit vetrarins þá kemur þetta smá á óvart en þetta er spá sem maður gat alveg búist við. Við ætlum okkur að vera ofar en þetta, það er klárt. Við teljum okkur vera með fínt lið í höndunum. VIð höfum verið að gera fína hluti í vetur þar sem við höfum unnið öll stærstu lið Íslands. Við ætlum okkur að vera ofar en 10. sæti. Þetta er lið sem er með mikla reynslu úr efstu deild og við ætlum okkur betri árangur en þetta."

Komnir:
Helgi Valur Daníelsson tekur skóna af hillunni
Jonathan Glenn frá Bandaríkjunum
Stefán Ari Björnsson frá Gróttu

Farnir:

Sjá einnig:

Leikmenn Fylkis sumarið 2018:
1 Aron Snær Friðriksson
2 Ásgeir Eyþórsson
3 Ásgeir Börkur Ásgeirsson
4 Andri Þór Jónsson
5 Orri Sveinn Stefánsson
6 Oddur Ingi Guðmundsson
7 Daði Ólafsson
8 Emil Ásmundsson
9 Hákon Ingi Jónsson
10 Andrés Már Jóhannesson
11 Arnar Már Björgvinsson
12 Stefán Ari Björnsson
14 Albert Brynjar Ingason
15 Orri Hrafn Kjartansson
17 Davíð Þór Ásbjörnsson
Arnór Gauti Brynjólfsson
18 Jonathan Ricardo Glenn
19 Ragnar Bragi Sveinsson
21Benedikt Daríus Garðarsson
23 Ari Leifsson
24 Elís Rafn Björnsson
25 Valdimar Þór Ingimundarson
28 Helgi Valur Daníelsson
29 Axel Andri Antonsson
34 Björn Metúsalem Aðalsteinsson
49 Ásgeir Örn Arnþórsson

Leikir Fylkis 2018:
28.apríl Víkingur R. – Fylkir
6. maí Fylkir - KA
13. maí Valur - Fylkir
17. maí Fylkir - ÍBV
22. maí Stjarnan - ÍBV
28. maí Fylkir - FH
4. júní Grindavík - FH
8. júní Fylkir - Keflavík
13. júní Breiðablik - Fylkir
1. júlí Fjölnir - Fylkir
9.júlí Fylkir – Víkingur R.
16. júlí Fylkir - KR
22. júlí KA - Fylkir
29. júlí Fylkir - Valur
4. ágúst ÍBV - Fylkir
12. ágúst Fylkir - Stjarnan
19. ágúst FH - Fylkir
27. ágúst Fylkir - Grindavík
31. ágúst Keflavík - Fylkir
16. september Fylkir - Breiðablik
23. september KR - Fylkir
29. ágúst Fylkir - Fjölnir

Spámennirnir: Arnar Daði Arnarsson, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Magnús Már Einarsson, Magnús Þór Jónsson og Tryggvi Guðmundsson.