Arjen Robben er ekki mikið fyrir Evrópudeildina.
„Að vinna Evrópudeildina myndi ekki gefa mér neitt," segir Arjen Robben, stórstjarna þýska liðsins FC Bayern. Bæjarar eru sem stendur í fjórða sæti þýsku deildarinnar, sæti frá Meistaradeildarsæti.
Ef Bayern nær ekki að komast í Meistaradeildina segist Robben ekki hafa nokkurn áhuga á að spila í Evrópudeildinni.
„Ég get ekki hugsað út í það að spila í Evrópudeildinni. Það er það versta sem gæti gerst. Ég held að það væri betra að vera bara ekki með í þessari keppni yfir höfuð. Þetta er keppni sem ég hef ekki nokkurn áhuga á að vinna."
Bayern er úr leik í Meistaradeildinni þetta tímabilið eftir að hafa beðið lægri hlut fyrir Inter í 16-liða úrslitum í vikunni.
