,,Ég er búin að vera að stefna að þessu lengi og var eiginlega búin að ákveða að taka eitt tímabil með Breiðablik í sumar. En það kom upp að ég fór á trial hjá Malmö og það gekk rosalega vel þar og þeir voru ánægðir með mig og vildu fá mig. Mér fannst það tækifæri sem ég gæti ekki sleppt og ákvað að taka því og er að fara út í næstu viku," sagði Sara Björk Gunnarsdóttir við Fótbolta.net í dag en hún hefur ákveðið að ganga til liðs við LdB Malmö í Svíþjóð.
,,Þeir voru búnir að vera að fylgjast með mér og ég hef verið í sambandi við þá síðan ég var 17 ára. En þeir hafa aldrei séð mig spila að mínu mati vel, en ég stóð mig vel úti og sýndi hvað ég get. Þeir voru ánægðir með mig."
,,Stelpurnar úti sem spila þarna eru mjög ánægðar með deildina og þetta er mjög gott lið og gaman að fá samkeppni. Mér finnst skemmtilegast að vera í keppni og ætla mér að komast í liðið, það er markmiðið. Það er gott að fá samkeppni því þá leggur maður ennþá harðar að sér."
Sara hefur leikið með Breiðablik síðan á miðju tímabili 2008 en yfirgefur nú félagið. En er erfitt að kveðja þær?
,,Já, mjög erfitt, sérstaklega á þessum tímapunkti því ég var búin að setja mér markmið með liðinu og ætlaði að vera eitt tímabil í viðbót. Svo kemur þetta svona fljótt inn og ég er að fara frá liðinu svona snemma, það er erfitt."
