Ashley Bares í leiknum í kvöld, en hún skoraði þrennu.
Ashley Bares átti frábæran leik líkt og liðsfélagar sínir þegar Stjarnan bar 4-0 sigur úr bítum gegn Breiðablik í Pepsi deild kvenna í Kópavoginum í kvöld. Með sigrinum er lið Stjörnunnar komið á topp deildarinnar og var Ashley ánægð með frammistöðuna.
„Þetta var góður sigur. Ég held að við höfum verið pínu stressaðar í byrjun og það tók okkur örlítið lengur að komast inn í leikinn en við höfðum hugsað okkur. En í hálfleik ræddum við málið, breyttum aðeins til og spiluðum betur í seinni hálfleik,“ sagði Ashley við Fótbolta.net.
Aðspurð hvort að það hafi gefið liðinu aukinn kraft að vita í hálfleik að Valur hafi tapað gegn ÍBV í Vestmannaeyjum segist Ashley ekki hafa vitað af því, enda tali hún ekki íslensku og gleymdist að þýða fregnirnar fyrir hana.
„Ég vissi reyndar ekki af því fyrr en eftir leikinn vegna þess að ég skil ekki það sem hinir segja, en það er alltaf hvatning að fara bara út og leggja sig fram og vinna leikinn, en það var gott að fá þessar fréttir eftir leikinn.“
Ashley skoraði þrjú fyrstu mörk Stjörnunnar í leiknum og var hún að sjálfsögðu ánægð með það.
„Það er alltaf gaman fyrir framherja að skora þrennu og það var gott að geta hjálpað liðinu,“ sagði hún við Fótbolta.net.
Viðtalið í heild sinni má sjá hér að ofan.
