Shaneka Gordon er besti leikmaður 13. umferðar á Fótbolta.net
Shaneka Gordon, framherjinn fljóti í liði Grindavíkur, er besti leikmaður 13. umferðar á Fótbolta.net. Shaneka átti toppleik fyrir Grindavík í mögnuðum 3-2 útisigri á Breiðablik en hún skoraði meðal annars tvö mörk í leiknum.
„Við vissum alltaf að við ættum erfiðan leik fyrir höndum gegn Breiðabliki en liðið hélt vel gegn sterku Blikaliði og ég er mjög stolt af frammistöðu okkar og baráttuandanum. Við vitum að það getur allt gerst og við unnum þarna góðan sigur“, sagði Shaneka um leikinn gegn Breiðablik.
„Ég er mjög ánægð með frammistöðu mína. Liðsfélagar mínir treysta á að ég skili mínu besta þegar ég fer út á völlinn og ég er ánægð og stolt af því að hafa hjálpað Grindavík að landa sigrinum.“
Shaneka og liðfélagi hennar, Dernelle Mascall, hafa verið skæðar í framlínu Grindavíkur í sumar en þær ná mjög vel saman á vellinum og sýna gjarnan skemmtilega takta. Shaneka segir þær stöllur þekkjast vel og að það hjálpi þeim að ná saman á vellinum.
„Við spiluðum saman í háskóla og þekkjumst því vel og náum vel saman. Þetta er eins og að spila með bestu vinkonu sinni og ég er mjög ánægð með að hún hafi komið hingað til að spila með mér og Grindavíkurliðinu. Hún þekkir mig vel og veit hvar og hvenær hún á að spila boltanum.“
Lið Grindavíkur sat á botni deildarinnar með eitt stig fyrir tveimur vikum en hefur nú unnið síðustu tvo leiki sína og farið upp fyrir Þrótt og í 9. sætið. Shaneka er bjartsýn á að Grindavík nái að halda sæti sínu í deildinni þrátt fyrir slaka byrjun.
„Ég hef trú á því að Grindavík geti enn bjargað sér frá falli. Við erum að spila agaðan fótbolta þessa stundina og erum vel skipulagðar. Ég held að liðið geti komið á óvart og komist burt af fallsvæðinu. Trúin flytur fjöll og við erum staðráðnar í að gera okkar besta,“ sagði Shaneka.
Shaneka kom til Íslands í fyrra og lék sjö leiki með Grindavíkurliðinu. Hún segist vera ánægð með að hafa tækifæri til að koma aftur til Íslands í sumar og leika annað tímabil með Grindavík.
„Ég kann mjög vel við mig á Íslandi. Þetta er fallegt land og það er nóg af skemmtilegum hlutum að gera hérna. Þetta er því aftur skemmtileg reynsla fyrir mig.“
„Ég ákvað að koma aftur til Grindavíkur því ég tel mig geta hjálpað liðinu á þessari erfiðu leiktíð. Ég er mjög ánægð með ákvörðun mína. Ég kann virkilega vel við liðsfélaga mína og starfsfólkið í kringum liðið. Hér eru allir að vinna af heilindum og hafa trú á liðinu. Þetta er yndislegt fólk og þau hafa látið mér líða vel svo ég er þakklát fyrir að hafa fengið tækifæri til að koma aftur.“
Við spurðum Shaneku að lokum út í leikinn mikilvæga gegn Þrótti sem fram fer annað kvöld kl.19:15 í Grindavík. Eitt stig skilur liðin að fyrir leikinn. Grindavík er sem fyrr segir í 9. sæti deildarinnar með 7 stig en Þróttarar sitja á botninum með 6 stig. Shaneka býst við hörkuleik og hlakkar til að spila.
„Það eru allir leikir mikilvægir og það verður engin undantekning í leiknum við Þrótt. Þetta verður hörkuleikur og það mun koma í ljós hvort liðið verður baráttuglaðara á miðvikudag. Ég er ekkert stressuð, hlakka bara rosalega til að mæta þeim,“ sagði Shaneka Gordon, besti leikmaður 11. umferðar að lokum við Fótbolta.net.
