Mario Balotelli vill ekki að krakkar fikti með flugelda.
Mario Balotelli er sífellt í fréttunum. Á laugardaginn bárust fréttir af því að eldur kom upp í íbúð hans eftir að kveikt var á flugeldum á baðherberginu. Á sunnudag fór hann síðan á kostum í 6-1 sigri Manchester City á grönnunum í United.
Nú hefur hann gerst andlit auglýsingaherferðar þar sem fólk er hvatt til að sýna öryggi og aðgát í notkun á flugeldum.
„Það er mikilvægt að krakkar fikti ekki með flugelda. Þeir geta verið mjög hættulegir ef þeir eru ekki notaðir á réttan hátt," segir Balotelli.
„Ég vil taka það fram að það var ekki ég sem kveikti á flugeldunum í íbúðinni minni. Það var vinur minn og ég vissi ekkert um það fyrr en ég heyrði öskur frá baðherberginu. Þetta var mjög heimskulegt."
Í dag keyrði Balotelli svo um götur Manchester með tónlistina í botni og gaf stuðningsmönnum fimmur. „Þeir hafa alltaf sýnt mér stuðning, líka þegar mér hefur gengið illa. Annars er mér sama hvað fólk úti í bæ segir um mig. Ég einbeiti mér að fótboltanum, knattspyrnustjóranum, kærustunni og fjölskyldu minni," segir Balotelli.
