Enskir fótboltadómarar halda áfram að stela senunni en Chris Foy er ekki vinsæll hjá stuðningsmönnum Tottenham eftir hörmulega frammistöðu hans og aðstoðarmanna í leik Stoke og Tottenham í dag.

Lið Tottenham var alls ekki líkt sjálfu sér í fyrri hálfleiknum. Stoke byrjaði leikinn miklu mun betur og skoraði Matthew Etherington fyrsta mark leiksins á 13. mínútu. Þegar Tottenham virtist vera að vakna skoraði Stoke aftur og aftur var það Etherington.

Bæði mörk Stoke komu eftir löng innköst frá Ryan Shotton.

Á 62. mínútu náði Tottenham að minnka muninn úr vítaspyrnu. Glenn Whelan var dæmdur brotlegur og gat ekkert kvartað, hann felldi Luka Modric og réttilega dæmt. Emmanuel Adebayor fór á punktinn, sendi Sörensen í rangt horn og skoraði.

Tottenham hefði vel getað fengið þrjú víti til viðbótar í leiknum en Foy dómari var ekki með á nótunum.

Eftir að hafa minnkað muninn stigu gestirnir vel á bensíngjöfina og jöfnunarmarkið lá í loftinu. Ryan Shawcross bjargaði á línu með hendi en ekkert var dæmt. Strax á eftir skoraði Adebayor en var ranglega dæmdur rangstæður.

Þetta var greinilega ekki dagur Tottenham því Yones Kaboul fékk sitt annað gula spjald og þar með rautt á lokakaflanum. Gestirnir luku því leik tíu og voru það heimamenn í Stoke sem fögnuðu góðum sigri sem lyftir þeim upp í áttunda sæti. Tottenham er enn í þriðja sæti, sjö stigum á eftir Manchester City sem trónir á toppnum.