Barcelona mun mæta Santos frá Brasilíu i úrslitaleik HM félagsliða í Japan á sunnudag en þetta varð ljóst eftir öruggan 4-0 sigur spænska liðsins á Al Sadd frá Katar í undanúrslitunum í morgun.

Barcelona varð fyrir áfalli í leiknum því David Villa framherji liðsins fótbrotnaði rétt fyrir leikhlé.

Þrátt fyrir það áttu Börsungar ekki í vandræðum með að skora í dag. Adriano skoraði tvívegis i fyrri hálfleik fyrra mark hans var nokkuð skondið. Pedro átti fyrirgjöf sem fór í Nadir Belhadj og þaðan á markvörðinn Mohamed Saqr sem skaut í Adriano og inn.

Í síðari hálfleik bættu Seydou Keita og Maxwell við mörkum og öruggur sigur Börsunga í höfn.