Guðmundur í leik gegn KS/Leiftri fyrr í sumar.
KR-ingar hafa fengið kant og sóknarmanninn Guðmund Pétursson að láni frá liði ÍR í annarri deildinni út tímabilið og hefur hann þegar fengið leikheimild með Vesturbæjarliðinu.
,,Þetta er ungur og efnilegur strákur sem ég er búinn að vera fylgjast með í allt vor. Strákur sem að ég held að geti þróast til að verða knattspyrnumaður í Landsbankadeildinni," sagði Teitur Þórðarson þjálfari KR í kvöld aðspurður út í Guðmund en þessi tvítugi leikmaður hefur skorað tvö mörk í ellefu leikjum í annarri deildinni í sumar.
,,Það er ástæðan fyrir því að ég vildi fá hann á láni út tímabilið í byrjun en vona að það þróist þannig að við viljum halda honum til lengri tíma," bætti hann við.
,,Þetta er strákur sem ég er búinn að sjá í mörgum leikjum en hann er ekki alltaf búinn að vera í byrjunarliði. Frá því að ég sá hann fyrst fannst mér hann hafa eitthvað sem mér líkaði og ég vildi skoða nánar og þess vegna reyndi ég að fá hann og þakka ég ÍR-ingunum fyrir að hafa verið hjálplegir við það," sagði Teitur að lokum við Fótbolti.net.
Athugasemdir
