Í Laugardalnum í dag mættust Valur og KR í hreinum úrslitaleik um annað sætið í Landsbankadeild karla. KR nægði jafntefli til að ná 2.sætinu en Valur varð að vinna.

Leikurinn fór ágætlega af stað en fyrst um sinn var ekki mikið marktækifæri. Valsmenn voru þó sterkari aðilinn í fyrri hálfleiknum og þeir voru fyrri til að komast blað en það var Pálmi Rafn Pálmason sem kom þeim á bragðið á 18.mínútu, fyllilega verðskuldað.

Eins og áður segir voru heimamenn sterkari í fyrri hálfleiknum án þess að ná að skapa sér nein opin marktækifæri. Þrátt fyrir pressuna frá Val náði KR að jafna nokkuð óvænt á 38.mínútu úr einni af sínum fáu sóknum í hálfleiknum en þar var að verki Grétar Ólafur Hjartarson. Skúli Jón Friðgeirsson fékk sendingu inn fyrir vörnina á hægri kantinum, komst framhjá varnarmanni og sendi boltann út í teiginn þar sem Grétar kláraði færið örugglega.

Seinni hálfleikurinn byrjaði fjörlega og enn voru það Valsmenn sem sóttu af krafti. Aðeins nokkrum mínútum eftir að hálfleikurinn hófst fékk varnarmaðurinn Atli Sveinn Þórarinsson dauðafæri eftir hornspyrnu en laust skot hans fór beint á Kristján Finnbogason í marki KR. Stuttu eftir þetta skölluðu Valsmenn svo í slánna.

Á 58.mínútu fékk markaskorarinn Grétar Ólafur frábæra stungusendingu inn fyrir vörn Vals frá varamanninum Ágústi Gylfasyni en Kjartan Sturluson í marki Vals kom út á móti og braut á honum. Dómari leiksins ákvað að gefa Kjartani gult spjald en stuðningsmenn KR voru hundóánægðir með það og vildu fá rautt.

Fyrrum KRingurinn Guðmundur Benediktsson fékk síðan gott færi til að koma Val yfir en Kristján í markinu varði vel. Það var svo annar fyrrum KR-ingur sem kom Val í 2-1 en Garðar Jóhannsson skoraði gott mark eftir klafs í teignum eftir að fyrirgjöf hafði komið frá hægri kantinum. Miðað við gang leiksins var þetta fyllilega verðskuldað fyrir heimamenn.

Eftir þetta dofnaði heldur yfir leiknum og virtist sem svo að þetta yrðu úrslit leiksins. Það var þó ekki því þegar nokkrar mínútur voru komnar fram yfir venjulegan leiktíma jafnaði varamaðurinn Guðmundur Pétursson muninn og tryggði þar með KR annað sætið í Landsbankadeildinni í ár. Þetta var aðeins þriðji leikur Guðmundar fyrir Vesturbæjarliðið því hann kom frá ÍR rétt fyrir lokun félagskiptagluggans í sumar.

KR-ingar geta talið sig heppna að komast með eitt stig heim því Valsmenn voru mun sterkari aðilinn í leiknum og hefðu getað skorað fleiri mörk. En það eru mörkin sem telja og KR gerðu það sem gera þurfti og ná því öðru sætinu og þar með sæti í UEFA bikarnum á næstu leiktíð.