Þessu hefur Fótbolti.net áreiðanlegar heimildir fyrir en þrátt fyrir fjölda tilrauna hefur Eyjólfur ekki svarað símtölum og skilaboðum Fótbolta.net síðan á föstudag í síðustu viku.

Vefsíðan Vísir.is segir frá því í kvöld að Eyjólfur hafi beðið Eið Smára Guðjohnsen landsliðsfyrirliða að afsala sér fyrirliðabandinu og það sem meira er þá ætti hann að tilkynna það sjálfur. Eiður hafi ekki fallist á það enda ætti þessi ákvörðun að vera í höndum landsliðsþjálfarans ef hún yrði tekin

Ljóst er að agavandamál hafa átt sér stað hjá landsliðshópi Íslands og pirringur er meðal sumra leikmanna liðsins vegna þessa.

Þannig læddust tveir leikmanna liðsins út að næturlagi eftir leik Íslands og Spánar í september síðastliðnum en hafa þrátt fyrir það báðir spilað í þeim þremur leikjum sem landsliðið hefur spilað síðan þá. Annar þeirra hefur spilað í öllum leikjunum og hinn í tveimur.

Þá var leikmönnum landsliðsins gert að mæta upp á hótel landsliðsins á miðnætti laugardaginn 13. október síðastliðinn eftir leik liðsins gegn Lettlandi á Laugardalsvelli. Að minnsta kosti einn leikmanna liðsins mætti ekki á tilsettum tíma og sást skemmta sér þá um nóttina.

Virðist sem Eyjólfur taki ekki með nægri festu á vandamálum sem slíkum en skemmst er að minnast þess þegar þrír lykilmenn í sænska landsliðinu gerðust sekir um slík agabrot fyrir ári síðan og voru sendir heim.

Mikil umræða hefur verið um þessi mál í þjóðfélaginu upp á síðkastið en málið hefur ekki ratað í fjölmiðla fyrr en Vísir.is braut Ísinn með umfjöllun sinni í kvöld.

Samningur Eyjólfs Sverrissonar sem þjálfari landsliðsins rennur út 31. október næstkomandi og því kominn tími á að KSÍ gangi frá ráðningu þjálfara hvort sem Eyjólfur verði endurráðinn eða annars manns leitað. Eyjólfur mun hinsvegar væntanlega stýra liðinu í leiknum gegn Dönum 21. nóvember næstkomandi.

Sjá einnig:
Grein Vísis frá í kvöld.