Kolbeinn Sigþórsson.
Kolbeinn Sigþórsson hefur skrifað undir nýjan samning við hollenska félagið AZ Alkmaar og framlengir þar með fyrri samningi um tvö ár. Þetta staðfesti Andri Sigþórsson bróðir hans og umboðsmaður í samtali við Fótbolta.net í dag.
Kolbeinn hafði gert þriggja ára samning við AZ Alkmaar síðasta sumar er hann gekk í raðir félagsins frá HK. Hann skrifaði nú undir fimm ára samning og á því fjögur ár eftir af samningi ´sinum.
Kolbeinn sem er 18 ára gamall var mjög óheppinn á sinni fyrstu leiktíð með AZ Alkmaar og var meiddur nánast allt tímabilið og var ekki heill fyrr en alveg í lokin þegar hann náði að spila einn leik.
Hann er alveg meiðslafrír í dag og æfði á fullu hér á Íslandi í sumar og er nú kominn til Hollands að nýju þar sem hann er í toppformi og hefur skorað fimm mörk í tveimur leikjum með varaliði félagsins.
Þrátt fyrir að hafa misst svo mikið úr vegna meiðsla á síðustu leiktíð ákvað AZ Alkmaar að bjóða honum nýjan samning sem hann hefur nú skrifað undir. Áður en hann ákvað að ganga í raðir AZ Alkmaar síðasta sumar var hann mjög eftirsóttur og meðal annars hafði Arsene Wenger knattspyrnustjóri Arsenal mikinn hug á að næla í hann varð að lúta í lægra haldi fyrir AZ Alkmaar.
Athugasemdir
