Heimild: Vefsíða KSÍ
Gunnleifur Gunnleifsson er í byrjunarliði í dag
Brynjar Björn Gunnarsson snýr aftur í íslenska liðið eftir meiðsli.
Veigar Páll Gunnarsson er í framlínu Íslands.
Í dag kl. 18:45 hefst leikur Hollands og Íslands í undankeppni HM 2010 og er leikið á De Kuip vellinum í Rotterdam. Leikurinn verður í beinni útsendingu á Stöð 2 Sport og hefst útsendingin kl. 18:15.
Ólafur Jóhannesson, landsliðsþjálfari, hefur tilkynnt byrjunarlið sitt fyrir leikinn í kvöld. Gunnleifur Gunnleifsson markvörður HK mun verða í marki íslenska liðsins að þessu sinni en Árni Gautur Arason vermir varamannabekkinn.
Grétar Rafn Steinsson er meiddur og í hans stað kemur Ragnar Sigurðsson inn í hægri bakvarðarastöðuna og Veigar Páll Gunnarsson er í framlínunni í stað Heiðars Helgusonar sem einnig er meiddur. Þá kemur Brynjar Björn Gunnarsson inn í liðið eftir meiðsli en Aron Einar Gunnarsson fær að verma varamannabekkinn í hans stað.
Byrjunarliðið (4-5-1):
Gunnleifur Gunnleifsson - Ragnar Sigurðsson, Hermann Hreiðarsson, Kristján Örn Sigurðsson, Indriði Sigurðsson - Birkir Már Sævarsson, Brynjar Björn Gunnarsson, Stefán Gíslason, Eiður Smári Guðjohnsen - Emil Hallfreðsson - Veigar Páll Gunnarsson.
Fyrirliðinn, Hermann Hreiðarsson, leikur sinn 80. landsleik í dag. Þrír af fjórum varnarmönnum Íslands sem byrja leikinn eru Sigurðssynir. Þetta gæti valdið erlendum sjónvarpsmönnum einhverjum vandræðum.
Þeir sem ekki verða á skýrslu í dag eru þeir: Grétar Rafn Steinsson, Guðmundur Steinarsson, Heiðar Helguson og Helgi Valur Daníelsson.
Þessar þjóðir hafa mæst 10 sinnum til þessa og hafa Hollendingar haft töluverða yfirburði í þessum viðureignum. Átta sinnum hafa Hollendingar farið með sigur af hólmi en tvisvar hefur niðurstaðan verið jafntefli.
Íslendingar hafa eitt stig eftir tvö leiki í undankeppninni til þessa. Jafntefli varð í leiknum gegn Noregi, 2-2 en Skotar höfðu sigur á Laugardalsvelli, 1-2. Hollendingar hafa leikið einn leik til þessa í riðlinum, sigruðu Makedóníu á útivelli, 1-2.
Íslenski hópurinn kemur svo heim á morgun og hefst þá strax undirbúningur fyrir leikinn gegn Makedóníu á miðvikudaginn. Leikurinn fer fram á Laugardalsvelli og hefst kl. 18:00. Miðasala er í fullum gangi á midi.is og eru landsmenn hvattir til þess að tryggja sér miða í forsölu á mjög hagstæðu verði.
