Heimild: Daily Mail
Steven Gerrard.
Enskir fjölmiðlar hafa ekki greint frá miklum nýjum tíðindum af Steven Gerrard þegar leið á daginn í dag en hann er í haldi lögreglu eftir líkamsárás í Southport í nótt.
Þó hefur nú verið staðfest að maðurinn sem ráðist var á hafi verið plötusnúður á Lounge Inn skemmtistaðnum í Soutport á Merseyside. Auk Gerrard voru fimm aðrir handteknir vegna árásarinnar.
Ekki er búið að staðfesta ástæðu árásarinnar en þó hefur því verði haldið fram í enskum fjölmiðli í dag að ráðist hafi verið á plötusnúðinn þegar hann neitaði að spila ákveðna plötu.
Gerrard mun hafa farið út að skemmta sér með vinum sínum eftir 1-5 sigur Liverpool á Newcastle í gær en hann skoraði sjálfur tvö mörk í leiknum. Hann var svo handtekinn eftir árásina en ekkert hefur komið fram enn um hvaða hlut hann átti í máli.
Alex Curran, eiginkona hans sást á kaffihúsi í nágrenni lögreglustöðvarinnar þar sem Gerrard hefur verði í yfirheyrslum í dag. Hún neitaði að svara spurningum fréttamanna er hún fór í bifreið sína og keyrði í átt til Liverpool.
Skemmtistaðurinn var enn lokaður í dag en í gegnum glugga mátti sjá greinileg merki um slagsmál, meðal annars greinilega blóðbletti á gólfinu auk brotinna glasa.
Ekki er enn búið að leggja fram kæru í málinu en plötusnúðurinn var með áverka á andliti, þó ekki lífshættulega. Liverpool hefur ekki viljað tjá sig um málið í dag.
Athugasemdir
