Heimild: Verdens Gang
Hinn 15 ára gamli Ingólfur Sigurðsson, einn efnilegasti leikmaður landsins, er á óskalista margra norskra úrvalsdeildarliða en þarlendir fjölmiðlar líkja honum við Walesverjann Ryan Giggs.
,,Þetta er mjög spennandi leikmaður sem svipar til Ryan Giggs,“ sagði Reidar Vågnes, yfirmaður íþróttamála hjá norska úrvalsdeildarliðinu Álasundi í samtali við Verdens Gang, en félagið hefur verið með Ingólf undir smásjánni í þónokkurn tíma.
,,Hann er vinstri kantmaður, með mikla tækni, kemst auðveldlega framhjá leikmönnum, er með góðan skotfót og fer vel með boltann,“ sagði Vågnes ennfremur og ljóst að hann hefur mikið álit á leikmanninum unga.
Ingólfur er uppalinn í Val en spilaði síðasta vetur með unglingaliði Heerenveen í Hollandi. Hann gekk aftur í raðir Valsmanna síðasta vor en skipti yfir í KR í lok júlí.
Hann vakti fyrst athygli norskra liða í febrúar í fyrra þegar hann þótti skara fram úr í leik með úrtakshópi U16 ára landsliðsins gegn norska liðinu Möre & Romsdal þar sem hann skoraði meðal annars frábært aukaspyrnumark.
Gjøran Johnsen, sem stýrði Möre í þeim leik, segir að Ingólfur hafi verið stórkostlegur og sýnt fram á hæfileika langt umfram aldur.
Ólafur Garðarsson, umboðsmaður Ingólfs, segir hann ekki vera á leið frá Íslandi í bili þrátt fyrir áhuga margra liða.
,,Það eru mörg lið á höttunum eftir Ingólfi en hann mun að öllum líkindum spila á Íslandi í sumar og síðan er óljóst hvað hann gerir.“
Athugasemdir