FH sigraði Hauka 5-2 í grannaslag í Lengjubikar karla í Kórnum í dag að viðstöddu fjölmenni en mikil stemning var á leiknum.

Haukar hefðu getað komist yfir í upphafi leiks þegar Guðjón Lýðsson slapp í gegn en Daði Lárusson varði. Á hinum enda vallarins áttu FH-ingar þrjú skot í sömu sókninni án þess að ná að skora en varnarmenn Hauka náðu að komast fyrir skotin auk þess sem eitt þeirra fór í stöngina.

Tryggvi Guðmundsson skoraði síðan fyrsta mark leiksins eftir hálftíma. Hann skoraði þá með góðu skoti eftir þríhyrningsspil við Atla Viðar Björnsson.

Atli Viðar bætti öðru marki við í upphafi síðari hálfleiks eftir samspil við Matthías Guðmundsson en Amir Mehica markvörður Hauka hafði farið í skógarferð og var nýkominn aftur í markið þegar að Atli Viðar skoraði.

Matthías Guðmundsson bætti þriðja marki FH við skömmu síðar þegar hann skoraði fallegasta mark leiksins með þrumuskoti upp í bláhornið frá vítateig.

Haukar náðu að minnka muninn þegar að Guðjón Pétur Lýðsson skoraði úr vítaspyrnu eftir að boltinn fór í hendina á Frey Bjarnasyni. FH-ingar fengu síðan vítaspyrnu á hinum enda vallarins þegar að Þórhallur Dan Jóhannsson braut á Atla Viðari Björnssyni.

Þórhallur Dan fékk einnig sitt annað gula spjald og þar með rautt en Tryggvi fór á punktinn og skoraði annað mark sitt og fjórða mark FH.

Matthías Vilhjálmsson skoraði því næst fimmta mark FH með skalla eftir hornspyrnu frá Tryggva. Gunnar Ásgeirsson lagaði síðan stöðuna fyrir Hauka á 84.mínútu þegar hann slapp í gegn og skoraði og lokatölurnar 5-2.

Þetta var síðasti leikur liðanna í riðlinum í Lengjubikarnum en FH-ingar unnu alla sína leiki og eru því komnir í 8-liða úrslitin. Haukar enduðu hins vegar með fjögur stig í fimmta sæti riðilsins.