Atli Guðnason og félagar í FH fara til Kazakhstan.
Nú rétt í þessu var dregið í fyrstu tvær umferðirnar í forkeppni Meistaradeildar Evrópu en Íslandsmeistarar FH munu mæta Aktobe frá Kasakstan.
Fyrri leikurinn fer fram í Hafnarfirði 14 eða 15.júlí en sá síðari verður í Aktobe viku síðar.
Aktobe hefur orðið meistari í Kazakhstan undanfarin tvö ár en liðið hefur aldrei komist áfram úr fyrstu umferðinni í forkeppni Meistaradeildarinnar.
Í fyrra mætti Aktobe liði FC Sheriff Tiraspol frá Moldavíu í fyrstu umferðinni og tapaði samanlagt 4-1.
Í ár eru fjórar umferðir í forkeppni Meistaradeildarinnar en ekki þrjár líkt og áður. FH-ingar koma hins vegar beint inn í aðra umferðina.
Af öðrum leikjum í annarri umferðinni má nefna að Pálmi Rafn Pálmason og félagar í Stabæk mæta Tirana frá Albaníu.
