Haukar eru komnir með fimm stiga forskot á næstu lið í öðru sæti 1.deildar karla eftir 1-0 sigur gegn ÍA á Akranesi í kvöld en úrslitin þýða að Skagamenn eru ennþá í þriðja neðsta sæti deilarinnar.

Úlfar Hrafn Pálsson skoraði eina mark leiksins á 4.mínútu og Skagamenn náðu ekki að jafna þrátt fyrir nokkrar tilraunir í síðari hálfleiknum.

Það var fínt veður á Akranesi þegar að sænski dómarinn Andreas Ekberg flautaði til leiks en hann dæmdi leikinn sem hluti af samstarfi knattspyrnsambandanna á Norðurlöndunum.

Haukar hófu leikinn af krafti og uppskáru fljótlega mark. Hilmar Trausti Arnarson stakk boltanum þá inn á Úlfar Hrafn Pálsson sem skoraði framhjá Páli Gísla Jónssyni í markinu.

Haukar áttu nokkrar fína spilkafla í fyrri hálfleik en þeir náðu þó ekki að skapa sér mörg færi. Á hinum enda vallarins áttu Ragnar Leósson og Gísli Freyr Brynjarsson tvær marktilraunir fyrir Skagamenn en Amir Mehica varði auðveldlega í marki Hauka.

Í upphafi síðari hálfleiks átti Guðmundur Böðvar Guðjónsson, hægri bakvörður ÍA, hörkuskot sem Amir náði að slá í slánna og yfir.Skömmu síðar fékk Hilmar Rafn Emilsson ágætis færi fyrir Hauka en skot hans fór yfir.

Þórður Þórðarson þjálfari ÍA gerði tvöfalda breytingu um miðjan hálfleikinn þegar að Sölvi Geir Gylfason og gamla brýnið Pálmi Haraldsson komu inn á. Þetta var fyrsti leikur Pálma í sumar en hann hóf æfingar að nýju á dögunum.

Skagamenn sóttu öllu meira og freistuðu þess að jafna en Helgi Pétur Magnússon og Arnþór Ingi Kristinsson fengu meðal annars skallafæri sem að þeim mistókst að nýta.

Á lokamínútu venjulegs leiktíma fékk varnarmaðurinn Árni Thor Guðmundsson fínt skotfæri eftir hornspyrnu en boltinn fór beint á Amir í markinu.

Haukar hefðu einnig getað bætt við öðru markinu en varamaðurinn Jónmundur Grétarsson fékk tækifæri til þess í viðbótartíma. Jónmundi voru hins vegar mislagðar fætur og hann náði ekki að koma almennilegu skoti á markið.

Það kom ekki að sök fyrir Hauka því að Ekberg flautaði til leiksloka skömmu síðar og Hafnfirðingar fögnuðu sigrinum vel og innilega enda í fínum málum í öðru sætinu þó að HK geti komist nær þeim með sigri á Þór á morgun.

ÍA er aftur á móti eins og áður sagði í þriðja neðsta sæti, tveimur stigum á eftir ÍR og þremur stigum frá fallsæti.