Heimild: AFP
Milan Jovanovic.
Serbneski landsliðsmaðurinn Milan Jovanovic skrifaði í dag undir samning við enska úrvalsdeildarfélagið Liverpool. Hann kemur til félagsins á frjálsri sölu frá belgíska 1. deildarliðinu Standard Liege í sumar. Þetta staðfestir umboðsmaður hans.
Þessi 28 ára gamli sókndjarfi miðjumaður kemur til Liverpool í júní næstkomandi. Hann skrifaði undir þriggja ára samning við Liverpool og fær 3 milljónir evra í laun á ári samkvæmt fréttum.
Hann mun hafa hafnað tilboði spænska stórliðsins Real Madrid í fyrra þar sem hann taldi að hann fengi ekki að spila nóg. AC Milan hafði einnig sýnt honum áhuga eins og Juventus og Valencia.
Jovanovic vakti athygli þegar Serbar komust á HM 2010 og einnig með Standard Liege sem vann tvo deildartitla í röð. Hann var nýlega valinn leikmaður ársins í Belgíu.
