Stefán Logi varði vítaspyrnu
Björn Bergmann Sigurðarson.
Björn Bergmann Sigurðarson skoraði annað mark Lilleström þegar liðið sigraði Start 3-2 á útivelli í norsku úrvalsdeildinni í kvöld eftir að hafa verið 0-2 undir í hálfleik.
Markið sem Björn skoraði kom á 71. mínútu en félagi hans í framlínunni, Arild Sundgot, skoraði hin tvö mörk liðsins.
Þetta var annað mark Björns í tveimur leikjum því hann skoraði eitt mark þegar liðið burstaði Sandefjord 4-0 um síðustu helgi.
Start fékk gullið tækifæri til að komast í 3-0 undir lok fyrri hálfleiks en Stefán Logi Magnússon, sem hafði einungis fengið á sig eitt mark í síðustu átta leikjum, varði vítaspyrnu frá Christian Bolanos.
Með sigrinum í dag skaust Lilleström upp í fjórða sæti deildarinnar.
