,,Við erum að reyna allt sem við getum til að komast í bæinn. Það er verið að skoða tuðruferðir og allt," sagði Heimir Hallgrímsson þjálfari ÍBV léttur í bragði við Fótbolta.net.

,,Við erum næsti flugvöllur við þetta eldgos og þegar flugvöllur er lokaður á Kanaríeyjum þá er eðlilegt að það sé erfitt að fljúga til Vestmannaeyja."

,,Það er sól og blíða en flugvöllurinn er lokaður út af gosinu og þetta er algjör synd. Við ætlum að koma yfir en það er bara spurning hvernig við förum að því."

Heimir segist vilja gera allt til að koma í veg fyrir frestun þar sem stutt er í næsta leik en ÍBV á að mæta Val í annarri umferðinni á laugardag.

Eyjamenn eru ennþá að leita að liðsstyrk og Heimir vonast til að fá leikmenn til félagsins áður en félagaskiptaglugginn lokar um helgina.

,,Vonandi skýrist þetta á næstu dögum. Við hefðum að sjálfsögðu viljað vera búnir að þessu fyrir fyrsta leik á Íslandsmóti því við höfum sagt frá upphafi að við ætlum að styrkja liðið."