Heimild: Heimasíða UEFA
Bernd Schuster hefur verið ráðinn þjálfari hjá tyrkneska félaginu Besiktas en hann skrifaði undir tveggja ára samning við félagið.
Schuster, sem er fimmtugur, tekur við af Mustafa Denizli sem þurfti að hætta á dögunum af heilsufarslegum ástæðum.
Schuster hefur verið í fríi frá þjálfun síðan hann var rekinn frá Real Madrid í desember árið 2008.
Tímabilið 2007/2008 hjálpaði Schuster liði Real Madrid að verða spænskur meistari en hann hafði áður gert góða hluti með Getafe.
Schuster og lærisveinar hans í Besiktas gætu mögulega komið til Íslands í sumar en liðið er eitt af þeim sem gætu mætt Breiðablik í annarri umferð Evrópudeildarinnar eða Fylki og KR ef þau komast áfram úr fyrstu umferð.
