Heimir Hallgrímsson, þjálfari ÍBV, er staddur á Englandi þar sem hann er að klára nám sem gefur UEFA Pro þjálfaragráðuna.
Heimir mun af þeim sökum missa af leik ÍBV og Stjörnunnar í Pepsi-deildinni á mánudag.
Í fjarveru hans mun aðstoðarþjálfarinn Dragan Kazic stýra Eyjamönnum ásamt Hjalta Kristjánssyni þjálfara KFS.
Heimir kemur síðan aftur til Íslands á mánudag og verður því á sínum stað þegar að ÍBV tekur á móti Keflavík eftir rúma viku.
Þetta er ekki í fyrsta sinn sem þjálfarar missa af leik hjá sínu liði þar sem þeir eru að klára þjálfaranám en það sama átti sér stað í fyrra þegar Willum Þór Þórsson og Þorvaldur Örlygsson misstu af leikjum hjá Val og Fram.