,,Þetta var skemmtilegur leikur og bæði lið ætluðu greinilega að selja sig dýrt, sem er bara flott og ég held að þetta hafi verið skemmtilegt fyrir alla," sagði Margrét Lára Viðarsdóttir framherji Kristianstad eftir 0-1 sigur á Val í æfingaleik í Egilshöll í gærkvöld.
Lið Kristianstad æfir allajafna utandyra í köldum vetri í Svíþjóð en fékk nú að spila innandyra í knattspyrnuhöllinni í Grafarvoginum.
,,Það er ekkert leiðinlegt að geta komið hingað inn í hlýjuna og spilað fótbolta. Það er bara virkilega gaman. Það er ískalt í skandinavíu þessa dagana svo það er lúxuslíf hérna á Íslandi."
,,Maður er bara á hóteli og að fara í Bláa lónið og Gullfoss og Geysi. Þetta er skemmtilegt og gaman að sýna stelpunum þetta. ÞVið erum þvílíkt búnar að tala Ísland hátt upp. Ég held að Ísland hafi staðið undir væntingum hjá stelpunum. Ég held að þetta hafi verið miklu skemmtilegra en að fara til Kýpur eða Krítar eða hvert sem er."
Margrét Lára spilaði með Val út tímabilið 2008 en hélt svo til Svíþjóðar þar sem hún hefur spilað síðan. En hvernig fannst henni Vals liðið?
,,Mér fannst þær bara lúkka vel, Valur er stórveldi og mun alltaf vera það. Það skiptir engu máli hver spilar undir merkjum Vals, það eru alltaf há markmið á Hlíðarenda og þær stóðu sig virkilega vel í dag og voru skipulagðar og seldu sig dýrt. Þetta var mjög jafn og skemmtilegur leikur."
Nánar er rætt við Margréti Láru í sjónvarpinu að ofan.
