Mark Redshaw lék 45 mínútur með Fram gegn Þór.
Framarar hafa ákveðið að losa sig við enska sóknarmanninn Mark Redshaw samkvæmt heimildum Fótbolta.net. Leikmaðurinn þótti einfaldlega ekki nægilega góður.
Redshaw var í byrjunarliði Fram gegn Þór á laugardaginn og var frammistaða hans það döpur að hann var tekinn af velli í hálfleik.
Hann fékk mjög slæma dóma í fjölmiðlum og til að mynda var honum gefin einkunin 3 af 10 í umfjöllun Fréttablaðsins.
„Framarar voru ömurlegir í fyrri hálfleik. Framherjinn sem þeir buðu upp á, Mark Redshaw,var best staðsetti áhorfandinn á vellinum. Hann var í raun ekkert með," sagði Óskar Hrafn Þorvaldsson, sérfræðingur RÚV í þættinum Íslenski boltinn í gær.
Ekki náðist í Þorvald Örlygsson, þjálfara Fram, við vinnslu fréttarinnar.
