Glódís Perla Viggósdóttir er gengin til liðs við Íslandsmeistara Stjörnunnar en hún er einn efnilegasti leikmaður landsins og var mjög eftirsótt af liðum hér á landi. Hún valdi hins vegar að ganga til liðs við Stjörnuna og kemur til félagsins frá SIK Horsens í Danmörku þar sem hún hefur verið síðan í september.
Hún er 16 ára gömul og er leikjahæsti leikmaður U17 ára landsliðs kvenna frá upphafi með 21 leik og 6 mörk. Hún hefur auk þess leikið 3 leiki með U19 ára landsliði kvenna.
Glódís Perla var í gær valin í 40 manna undirbúningshóp A-landsliðs kvenna fyrir komandi ár og fundar með Sigurði Ragnari Eyjólfssyni landsliðsþjálfara fyrir áramót.
Hér á landi hefur hún leikið í 1. deild kvenna með liði HK/Víkings og hóf ferilinn þar árið 2009. Síðan þá hefur hún spilað 21 leik og skorað 14 mörk.
Glódís Perla er þriðji leikmaðurinn sem Stjarnan fær til sín síðan liðið varð Íslandsmeistari í haust. Áður hafði Dagmar Mýrdal Gunnarsdóttir komið frá KR og Elva Friðjónsdóttir úr Þór/KA. Þá mun markadrottningin Ashley Bares einnig snúa aftur til félagsins fyrir næsta sumar.
