Heimild: Heimasíða Leiknis
Pétur og Arnar Einarsson, formaður Leiknis.
Leiknir Reykjavík úr fyrstu deildinni hefur fengið Pétur Már Harðarson til liðs við sig frá Gróttu.
Pétur Már, sem getur leikið allar stöður framarlega á vellinum og á miðjunni, hefur æft með Leiknismönnum í haust og í gær skrifaði hann undir samning við félagið.
,,Leiknismenn bjóða Pétur hjartanlega velkomin til liðsins og vænta mikils til af honum á komandi tímabili," segir á heimasíðu Leiknis.
Pétur hefur mestmegnis leikið með Gróttu á sínum ferli en í öðrum flokki fór hann í eitt ár til Bröndby í Danmörku auk þess sem hann var á mála hjá KR.
Þessi 22 ára gamli leikmaður hóf snemma leik með Gróttu í meistarflokki en árið 2005 lék hann sinn fyrsta leik þá einungis 16 ára gamall. Samtals hefur Pétur leikið 88 leiki í meistaraflokki og skorað í þeim 19 mörk.
