Michael Appleton, knattspyrnustjóri Portsmouth, hefur staðfest að íslenski varnarmaðurinn Hermann Hreiðarsson sé á leið til Coventry. Gengið verður frá félagaskiptunum um helgina.
Hermann er gríðarlega reyndur og hefur leikið með Charlton, Ipswich, Wimbledon, Brentford og Crystal Palace í enska boltanum.
Hann verður 38 ára næsta sumar og getur bæði leikið sem miðvörður og vinstri bakvörður. Hann var landsliðsfyrirliði Íslands í stjórnartíð Ólafs Jóhannessonar.
Coventry er í neðsta sæti ensku Championship-deildarinnar en vonast er til að reynsla Hermanns komi til með að hjálpa liðinu í baráttunni við falldrauginn. Sem stendur eru sjö stig upp úr fallsætinu.
Með Portsmouth vann Hermann FA-bikarinn 2008 en hann hefur ekki átt fast sæti í liðinu á leiktímabilinu.
