Sigursteinn Gíslason er fallinn frá eftir harða baráttu við krabbamein. Sigurstein þekkja allir fótboltaunnendur enda goðsögn í íslenskum fótbolta.
Sigursteinn var einn sigursælasti knattspyrnumaður Íslands, varð níu sinnum Íslandsmeistari með ÍA og KR. Hann var sæmdur gullmerki KSÍ á síðasta ári.
Eftir ferilinn fór Sigursteinn út í þjálfun og náði eftirtektaverðum árangri með Leikni í Breiðholti. Í byrjun síðasta sumars greindist hann með krabbamein og hefur nú þurft að játa sig sigraðan í þeirri baráttu 44 ára að aldri.
Þessi mikli meistari skilur eftir sig eiginkonu og þrjú börn.
Ljóst er að hans verður sárt saknað en starfsmenn Fótbolta.net fengu þann heiður að kynnast Sigursteini sem var alltaf til í að leggja síðunni lið á einn eða annan hátt.
Fótbolti.net sendir fjölskyldu og vinum Sigursteins innilegar samúðarkveðjur
