Hammarby er að reyna að kaupa Kjartan af KR og líklegt er að hann geri þriggja ára samning við félagið.

Ljóst er að það er mikil blóðtaka fyrir KR-inga ef Kjartan Henry fer en félagið hefur einnig misst Guðjón Baldvinsson úr sókninni frá því á síðasta tímabili.

Kjartan Henry var einn allra besti leikmaður Íslandsmótsins í fyrra en eftir tímabilið gerði hann nýjan þriggja ára samning við Íslands og bikarmeistarana.

Kjartan var markahæstur hjá KR með 12 mörk í 19 leikjum í Pepsi-deildinni í fyrrasumar. Þá lék hann sinn fyrsta A-landsleik þegar Ísland mætti Portúgal síðastliðið haust.

Hammarby leikur í næstefstu deild í Svíþjóð en liðið mætir Guðjóni Baldvinssyni, Kristni Steindórssyni og félögum í Halmstads í fyrstu umferð 9. apríl næstkomandi.