Þórður Birgisson.
,,Þetta var ótrúlegt. Við vorum svolítið stressaðir fyrir þennan leik. Við töluðum um að vera það ekki en í svona leikjum er það óhjákvæmilegt," sagði Þórður Birgisson framherji KF sem skoraði jöfnunarmarkið gegn Hamar í dag og tryggði þeim þar með sæti í 1. deildinni að ári.
,,Við vorum í kjörstöðu fyrir þennan leik en höfum aldrei átt auðvelda leiki hérna í Hveragerði. Það hefur alltaf verið erfitt og sem betur fer héldum við haus. Það er það sem réði úrslitum, við náðum að halda haus."
Nokkuð mikil barátta var í leiknum og leikmenn lágu nokkuð í grasinu eftir harkalegar tæklingar.
,,Það eru alltaf átök í 2. deildinni, mér fannst ekkert meiri átök í þessum leik en öðrum leikjum hjá okkur. Þetta er alltaf mikil barátta og mér finnst ekkert meira í þessum leik en öðrum."
Þórður skoraði tvö mörk seint í leiknum en það fyrra var dæmt af eftir að dómarinn flautaði það á en fundaði svo með línuverði og komst að þeirri niðurstöðu að það skildi ekki standa.
,,Ég sá ekki almennilega rangstöðumarkið, en mér er alveg sama, þetta hafðist. Við gerðum jafntefli, það dugði okkur og við fórum upp, frábært."
Nánar er rætt við Þórð í sjónvarpinu að ofan en þar svarar hann spurningum um afhverju hann neitaði að skipta í sterkari lið í félagaskiptaglugganum í júlí og segist ekki hafa tekið ákvörðun um framtíð sína núna.
Athugasemdir
