Jákvætt og neikvætt við landsleikinn
Einar Örn er fyrrum landsliðsmaður í handbolta.
Fótbolti.net fékk vel valda aðila til að skoða landsleik Íslands gegn Sviss í gær og nefna þrjá jákvæða og þrjá neikvæða punkta varðandi leikinn.
Einar Örn Jónsson, íþróttafréttamaður á RÚV, ríður á vaðið en síðar í dag birtum við álit frá fleiri álitsgjöfum.
Jákvætt:
- Hugarfar leikmanna
Allir gerðu sitt allra ítrasta til að spila jákvæðan fótbolta með vænum skammti af alíslenskri grimmd.
- Færin sem liðið skapaði
Góð lið nýta sín færi en fyrsta skrefið er að koma sér í færin. Við erum á réttri leið og á meðan við höldum áfram að skapa færi er bara tímaspursmál hvenær þau fara að detta.
- Birkir Bjarnason
Sívinnandi og þar af leiðandi síógnandi. Var út um allt og fjölhæfni hans á eftir að verða öflugt vopn á næstu árum.
Neikvætt
Neikvæðari atriðin eru öll saman mun léttvægari en þau jákvæðu.
- Andartakseinbeitingarleysið er enn til staðar
Hefði verið hægt að koma í veg fyrir bæði mörkin. Er þó varla stórvandamál lengur.
- Leikbönnin
Ekkert við leikmenn sjálfa að sakast, gul spjöld eru hluti af leiknum en það svíður engu að síður. Að tvö gul þýði leikbann í 10 leikja undankeppni er líka frekar hart.
- Tóm sæti
Mér finnst nú bara að það eigi alltaf að vera fullt þegar landsliðið spilar! Leikmenn eiga það skilið að færri komist að en vilji.
