Veigar Páll Gunnarsson og félagar í Stabæk enduðu lang neðstir.
Lokaumferðin í norsku úrvalsdeildinni fór fram í kvöld þar sem nokkrir Íslendingar voru á ferðinni og skoraði Veigar Páll Gunnarsson fyrir Stabæk í 3-1 tapi gegn Strømsgodset. Stabæk endaði í neðsta sæti deildarinnar og leikur í næst efstu deild að ári.
Ljóst er að Sandnes Ulf þarf enn að berjast fyrir sæti sínu í efstu deild eftir að hafa tapað 3-1 fyrir Álasund. Steinþór Freyr Þorsteinsson lék allan leikinn með Sandens Ulf en Arnór Ingvi Traustason kom inná sem varamaður undir lok leiksins á meðan Óskar Örn Hauksson vermndi varamannabekkinn.
Sandnes Ulf endaði í 14. sæti og þarf því að fara í umspil um sæti í efstu deild. Þar mætir liðið Ullensaker/Kisa sem er í fyrstu deildinni.
Indriði Sigurðsson og félagar í Viking enduðu í fimmta sæti eftir 2-1 sigur á Valarenga og Birkir Sævarsson endaði í sjötta sæti með Brann eftir 0-2 tap gegn Sogndal.
Pálmi Rafn Pálmason og lið hans Lillestrøm endaði í níunda sæti en liðið gerði markalaust jafntefli við Haugesund. Kristján Örn Sigurðsson og Arnór Aðalsteinsson léku þá allan leikinn með Hønefoss sem tapaði stórt fyrir Rosenborg, 1-4. Hønefoss rétt náði að halda sæti sínu í efstu deild en liðið endaði í þrettánda sæti, einu stigi frá umspilsætinu.
Molde vann deildina annað árið í röð en liðið endar með fjögurra stiga forystu á toppnum eftir 2-0 sigur á Fredrikstad sem féll niður um deild.
Athugasemdir
