Aron Jóhannsson hefur ákveðið að velja að leika með bandaríska landsliðinu í framtíðinni. Aron fæddist í Bandaríkjunum og hefur því getað valið hvort hann spilar fyrir Ísland eða Bandaríkin.
Eftir að hafa legið undir feld undanfarna mánuði hefur Aron nú ákveðið að gefa kost á sér í bandaríska landsliðið undir stjórn Jurgen Klinsmann.
,,Ég hef ákveðið að gefa kost á mér í landslið Bandaríkjanna í knattspyrnu. Val mitt hefur staðið á milli þess að spila með íslenska landsliðinu eða því bandaríska þar sem ég er með tvöfalt ríkisfang," sagði Aron í fréttatilkynningu í dag.
,,Ákvörðunin var ekki auðveld eða tekin í flýti enda stóð valið á milli tveggja góðra landsliða."
,,Ég þakka landsliðsþjálfurum Íslands fyrir áhuga þeirra og óska íslenska landsliðinu alls hins besta í framtíðinni.”
Aron lék tíu U21 árs landsleiki fyrir Íslands hönd en hann getur þrátt fyrir það leikið með A-landsliði Bandaríkjanna.
Hinn 22 ára gamli Aron getur byrjað strax að leika með landsliði Bandaríkjanna og fyrsti leikur hans gæti verið gegn Bosníu/Herzegóvínu þann 14. ágúst.
Í september gæti Aron spilað með Bandaríkjunum í undankeppni HM en liðið er á toppi riðilsins í baráttunni um sæti í keppninni í Brasilíu næsta sumar. Ágætis líkur eru því á að Aron spili á HM með Bandaríkjamönnum.
Athugasemdir