Óttar Bjarni gegndi lykilhlutverki í vörn Leiknis og skoraði að auki eitt mark í 2-0 sigri Breiðhyltinganna gegn BÍ/Bolungarvík á laugardaginn og var hann að vonum ánægður með sigurinn.

„Þetta var hörkuleikur og við náðum bara að nýta okkar færi. Þeir fengu alveg sín færi í leiknum en náðu ekki að hnýta endahnútinn í sínar sóknir sem betur fer. Við náðum að klára okkar og það skilaði okkur sigri í hús,“ sagði Óttar Bjarni við Fótbolta.net.

Ég hleyp bara á þetta
Þrátt fyrir að vera miðvörður er Óttar kominn með tvö mörk úr fyrstu þremur leikjum tímabilsins, en hann skoraði einnig í tapinu gegn ÍR í bikarnum.

„Það er alltaf gaman að skora, en ég geri nú minnst af þessu sjálfur. Strákarnir bomba þessu bara inn í teiginn og ég hleyp bara á þetta. Það er voða lítið sem ég er búinn að gera, þeir eru búnir að vinna alla vinnuna fyrir mig,“ sagði Óttar.

Eyjólfur Tómasson, markvörður Leiknis, varði vítaspyrnu í stöðunni 2-0 í leiknum og segir Óttar að hann hafi verið frábær í markinu það sem af er tímabils og frá því í vetur.

„Það var bara frábært, hann er búinn að vera frábær það sem af er þessu tímabili. Hann er búinn að verja vel og æfa vel í vetur, það er frábært að hafa hann í toppformi þarna fyrir aftan sig. Það gefur manni sjálfstraust,“ sagði Óttar, sem er einnig mjög ánægður með að vera kominn með Edvard Börk Óttharsson sér við hlið í miðverðinum.

„Ég er mjög ánægður með Edda. Á mínum stutta ferli hef ég spilað með sex eða sjö mönnum í hafsent hjá Leikni, þannig að maður er orðinn ansi vanur því að fá nýja menn inn. En ég vona að samstarfið við Edda sé byrjunin á einhverju góðu. Hann er yndislegur strákur og hrikalega gaman að vera í kringum hann.“

Voru með tvö stig á sama tíma í fyrra
Óttar Bjarni er fæddur á Fjórðungssjúkrahúsinu á Ísafirði og ólst upp fyrir vestan, en flutti ungur í Breiðholtið. Hann ber þó tilfinningar til Vestfjarðanna, en ekki endilega til knattspyrnufélagsins BÍ/Bolungarvíkur.

„Það eru alltaf tilfinningar til heimahaganna, maður gleymir því aldrei. Ég fæddist þarna 90 og var þarna uppalinn og flutti svo 95 í Breiðholtið, og hef að mestu leiti verið þar síðan, fyrir utan tvö ár um aldamótin þar sem ég bjó fyrir vestan,“ sagði Óttar.

,,Ég á fullt af ættingjum og vinum fyrir vestan, en ég hef svosum aldrei spilað með BÍ/Bolungarvík svo tilfinningarnar til liðsins sjálfs eru ekkert miklar, en það eru tilfinningar til Vestfjarðanna. En það er alltaf gaman að spila á móti BÍ, ég ber mikla virðingu fyrir þeim.“

Óttar er ánægður með góða byrjun Leiknisliðsins, sem hefur byrjað tímabilið á sigrum gegn Grindavík og BÍ/Bolungarvík í fyrstu tveimur leikjum sínum.

„Við erum bara mjög ánægðir með að byrja þetta á þennan hátt. Á sama tíma í fyrra vorum við með tvö stig, en nú erum við með sex stig. Þetta er það sem við ætluðum okkur, að gera betur en í fyrra, og þessi byrjun er skref í rétta átt,“ sagði Óttar, sem býst við jafnri dield líkt og í fyrra.

„Ég held klárlega að þetta verði svipuð deild og í fyrra, því það eru mörg frábær lið þarna. Grindavík, Haukar, Þróttarar, Víkingur Ó og ÍA, svo ég taki sem dæmi. Þessi deild mun ráðast á síðustu metrunum, bæði á botni og toppi. Við ætlum að reyna að halda í þessa góðu byrjun og reyna að gera betur en í fyrra. Eins og Óli Kristjáns sagði, svo verður bara talið í lokin upp úr hattinum.“

Sjá einnig:
Leikmaður 1. umferðar - Vilhjálmur Pálmason (Þróttur)