Frá undirskrift í dag.
Stjarnan hefur fengið kantmanninn Ævar Inga Jóhannesson til liðs við sig frá KA en hann skrifaði undir þriggja ára samning við félagið fyrr í dag.
Stjarnan komst á dögunum að samkomulagi við KA um kaup á Ævari en félagið hefur haft augastað á Ævari um nokkurt skeið.
Ævar spilaði frábærlega á síðasta keppnistímabili en þá skoraði hann 12 mörk í 23 leikjum fyrir KA og varð fyrir vikið eftirsóttur af mörgum liðum í Pepsi-deildinni.
Þá hefur Ævar leikið 27 leiki með U-17, U-19 og U-21 landsliðum Íslands en hann er í dag fastamaður í U21 árs landsliðinu.
„Knattspyrnudeild Stjörnunnar er gríðarlega ánægð með að fá þennan mjög efnilega leikmann í sínar raðir en hann er frábær viðbót við mjög öflugan leikmannahóp félagsins og ljóst er að samkeppnin innan liðsins verður mikil á komandi tímabili," segir í fréttatilkynningu frá Stjörnunni.
Athugasemdir
