Fótbolti.net

fim 16. desember 2004 09:00

Elvar Geir Magnússon

Ruud van Nistelrooy - Man Utd (9)

Áfram höldum við á Fótbolti.net að telja niður til jóla með því að kynna bestu knattspyrnumenn heims að mati lesenda okkar. Á aðfangadag verður besti leikmaður heims kynntur en nú er það leikmaðurinn sem varð í níunda sæti í kjörinu.

9. Ruud van Nistelrooy

Í suðurhluta Hollands er að finna bæ sem heitir Oss. Ruud van Nistelrooy fæddist í þessum bæ þann 1.júlí árið 1976 og sem skólastrákur fékk hann fljótt áhuga á íþróttum. Hann er mikill hæfileikamaður og var í fótbolta, tennis og fimleikum. Hann spilaði sem aftasti varnarmaður með bæjarliðinu en ferill hans tók stórt stökk 1993 þegar hann færði sig um set til FC Den Bosch sem þá var í 2.deildinni í Hollandi. Þetta var hans fyrsta atvinnumannalið og þar náði hann að sýna hvað hann kunni. Hann var látinn spila í sókninni, rétt fyrir aftan framherjana tvo.

Fyrsta tímabilið hjá Den Bosch spilaði Ruud reyndar lítið sem ekkert en það var árið 1997 sem hann sprakk algjörlega út. Þá skoraði hann 12 mörk í 13 leikjum og 1.deildarliðið Heerenveen fékk hann til sín. Þar var hann látinn spila í fremstu víglínu og skoraði hann 13 mörk í 31 leik fyrsta tímabil. Þjálfari hans hjá Heerenveen skipaði honum eitt sinn að fara að fylgjast með Dennis Bergkamp og sagði honum að læra af honum. Ruud keyrði 200 kílómetra til að fara að fylgjast með Bergkamp og það hefur skilað sér.

Á sama degi og Ruud van Nistelrooy varð 22 ára árið 1998 þá var hann keyptur til PSV Eindhoven, kaupverðið var 4,2 milljónir punda sem var met milli tveggja hollenskra liða. Hann var þó fljótur að sýna að hann var peningana virði og skoraði sitt fyrsta mark fyrir PSV gegn sínum fyrrum samherjum í Heerenveen, í lok október kom síðan hans fyrsta þrenna fyrir PSV en hann skoraði hana gegn Sparta.

18.nóvember 1998 lék Ruud sinn fyrsta landsleik fyrir Holland en það var gegn Þýskalandi. Leikurinn endaði með jafntefli 1-1. Tímabilið 1998/99 var hann markahæstur í hollensku deildinni (31 mark í 34 leikjum) og var að sjálfsögðu valinn leikmaður ársins í Hollandi. Tímabilið á eftir varð hann einnig markahæstur, hann gerði 60 mörk á tveimur tímabilum með PSV sem er undraverður árangur. Tímabilið 1999/2000 skoraði hann þrennur í báðum leikjunum gegn Ajax, í þeim síðari sagðist hann reyndar ekki hafa verið að spila neitt sérstaklega vel!

Mörg stórlið voru farin að sýna honum áhuga en Manchester United reyndi fyrst að kaupa hann í apríl 2000. Darren Ferguson, sonur Sir Alex Ferguson, bað föður sinn upphaflega um að fylgjast grannt með Ruud. Hann stóðst þó ekki læknisskoðun því fyrr í þessum mánuði hafði hann meiðst á hægra hné í æfingaleik gegn Silkeborg. United vildi að Ruud færi í uppskurð en hann neitaði því þar sem hann vissi að þá ætti hann ekki möguleika á að spila með hollenska landsliðinu á Evrópumótinu árið 2000 sem haldið var í Hollandi.

Hann komst fljótlega að því að hann hefði frekar átt að hlusta á þá í Manchester því tveimur dögum eftir þetta sleit hann liðbönd á æfingu með PSV. Það kom ekki í veg fyrir að hann var aftur valinn leikmaður ársins í Hollandi en útilokaði þó þátttöku hans á Evrópumótinu. Hann studdi þó þjóð sína af miklum krafti og snerti það hjörtu hollensku þjóðarinnar.

Margir sýndu Ruud stuðning í þessum erfiðu meiðslum og hughreystu hann, þar á meðal Ronaldo sem er fyrrum leikmaður PSV og Marc Overmars. Þá var Sir Alex Ferguson í stöðugu sambandi við hann og lét hann vita af því að Roy Keane og Lothar Matthaus hefðu lent í sömu meiðslum og náð sér að fullu. Með hjálp einkaþjálfara var Ruud kominn á hraðferð í átt að bata, hann eyddi klukkustundum í sundlauginni og á æfingasvæðinu, allt til að flýta fyrir bata.

Í mars árið 2001 fór Ruud að leika með PSV að nýju og hélt uppteknum hætti. Í sínum fyrsta leik eftir meiðslin skoraði hann tvö mörk og það var svo loks 23.apríl sem hann gekk til liðs við Manchester United. Hann neitaði tilboði frá Real Madrid og United fékk hann fyrir 19 milljónir punda sem var breskt met. Fyrsti leikur Ruud fyrir United var gegn Liverpool um Góðgerðarskjöldinn. Hann skoraði í leiknum en þó vann Liverpool.

Fyrsta tímabil sitt skoraði hann 36 mörk, nokkrum mánuðum eftir að útlit var fyrir að ferill hans gæti verið á enda. Þrátt fyrir öll þessi mörk frá Ruud náði United ekki að vinna titil þetta tímabil en það var í fyrsta skipti í fjögur ár sem þeir stóðu uppi með báðar hendur tómar. Ruud var staðráðinn í að vinna ensku úrvalsdeildina enda er hann þekktur fyrir að gefast ekki upp.

Hann meiddist snemma tímabilið 2002/03 og margir töldu að þetta yrði ekki hans tímabil. Það reyndist þó rangt því hann skoraði 47 mörk fyrir félag og landslið á tímabilinu, hann skoraði þ.á.m. í tólf leikjum í röð (tveir landsleikir meðtaldir)! Manchester United varð enskur meistari og komst í átta liða úrslit Meistaradeildar Evrópu þar sem hann var markahæstur. Eftirminnilegasta markið sem Ruud skoraði á tímabilinu var gegn Fulham þar sem hann fékk boltann á miðju vallarins, brunaði upp allan völlinn og kom honum í netið á endanum.

Nistelrooy átti ekki jafn gott tímabil 2003/04 en skoraði þó 37 mörk í öllum keppnum, þar á meðal sitt hundraðasta fyrir United. Hann var síðan ein af stjörnum Evrópukeppninnar 2004 þar sem hann var næst markahæstur ásamt Wayne Rooney. Á mótinu lýsti hann því yfir að draumur sinn væri að fá Rooney í United og eins og allir vita þá rættist sá draumur hans fyrir ekki alls löngu því Rooney var keyptur frá Everton.

Ruud van Nistelrooy er svo sannarlega markaskorari af guðs náð. Sir Alex Ferguson segir hann vera besta sóknarmann sem hann hafi haft í stjórnartíð sinni og skildi engan undra. Rutgerus, eins og móðir hans kallar hann, er frábær spyrnumaður, sterkur skallamaður, gefst aldrei upp og er umfram allt stórkostlegur sóknarmaður.