„Þetta var þægilegur sigur ef ég á að vera hreinskilinn," sagði Alfreð Finnbogason sáttur eftir 2-0 sigurinn á Tyrkjum í kvöld. „Við vorum að opna þá vel og leikplanið gekk mjög vel. Það er alltaf gaman að skora, sérstaklega fyrir landsliðið."
Alfreð fagnaði markinu með því að taka nokkur dansspor út við hornfána.
„Þetta var in the moment. Þetta var ekkert planað. Við vorum nýbúnir að skora og svo skoruðum við aftur. Adrenalínið stjórnaði þessu og það var ekkert á bakvið þetta," sagði Alfreð en ætlar hann að endurtaka þetta fagn? „Við sjáum hvernig viðtökurnar verða, kannski verður þetta mánaðarlegur viðburður."
Alfreð fékk fleiri góð færi í leiknum í kvöld og þá sérstaklega þegar hann slapp í gegn skömmu áður en hann skoraði. Varnarmaður náði þá að elta hann uppi. „Ég ætlaði að kötta inn á hægri og sá ekki gæann. Ég hafði minni tíma en ég áttaði mig á."
Alfreð hefur skorað í fyrstu þremur leikjunum í undankeppninni eftir að hafa verið mikið á bekknum á EM í sumar. „Stundum þarftu að bíta í súrt epli og ég þurfti lengi að sætta mig við það. Þá er að nýta tækifærið þegar það kemur og mér finnst ég hafa gert það."
Hér að ofan má sjá viðtalið í heild sinni en þar talar Alfreð meðal annars um meiðsli sem urðu þess valdandi að hann fór af velli í síðari hálfleik.
Athugasemdir