„Við liðsfélagarnir vorum á leið til Las Vegas en það var náttúrulega að afbóka það. Landsliðið hefur alltaf verið númer eitt fyrir mér og þetta var aldrei spurning."

Arnór hefur ekki verið í íslenska landsliðshópnum að undanförnu en hann fær sénsinn núna.

„Maður vonast alltaf til að vera með í þessum hópi. Þetta er frábær hópur og það er erfitt að komast inn. Það hefur gengið vel persónulega á tímabilinu í Svíþjóð og það þarf að byggja ofan á það."

Arnór spilaði með Hammarby á nýliðnu tímabili en hann kom til félagsins frá Helsingborg síðastliðinn vetur. Hammarby endaði í 11. sæti á nýliðnu tímabili.

„Þetta er skemmtilegur klúbbur með góða stuðningsmenn. Við byrjuðum tímabilið ekkert rosalega vel en náðum að rífa okkur upp og eiga góðan seinni hluta. Ég er að spila alla leiki og mér líður vel þarna," sagði Arnór en hann er spenntur fyrir leiknum gegn Króötum á laugardag.

„Þeir eru með gott lið og við erum með gott lið. Það hjálpar okkur kannski eitthvað að það verður spilað fyrir luktum dyrum. Þetta verður hörkuleikur tveggja góðra liða og við munum gera okkar besta og reyna að taka stig heim," sagði Arnór.

Hér að ofan má sjá viðtalið í heild sinni.