Stjarnan vann nauman sigur á Leikni Fáskrúðsfirði í Lengjubikarnum í dag, en leikið var á Stjörnuvelli í Garðabæ.

Það var aðeins eitt mark skorað í leiknum í dag og það gerði Baldur Sigurðsson fyrir Stjörnuna á 16. mínútu. Stjörnumenn byrjuðu betur og þeir komust sanngjarnt yfir.

Stjarnan var áfram betra liðið í seinni hálfleiknum, en þeir náðu samt ekki að skora annað mark. Eyjólfur Héðinsson fékk að líta sitt annað gula spjald undir lokin, en það hafði eins og gefur að skilja engin áhrif á lokastöðu leiksins.

Lokatölur urðu 1-0 fyrir Stjörnuna sem er núna með sjö stig eftir þrjá leiki. Leiknir F. er með 0 stig eftir tvo leiki, en þeir munu leika áfram í Inkasso-deildinni í sumar.

Byrjunarlið Stjörnunnar: Haraldur Björnsson (m) Brynjar Gauti Guðjónsson, Jósef Kristinn Jósefsson, Jóhann Laxdal, Daníel Laxdal, Baldur Sigurðsson, Hörður Árnason, Hilmar Árni Halldórsson, Hólmbert Aron Friðjónsson, Eyjólfur Héðinsson, Kristófer Konráðsson.

Byrjunarlið Leiknis F. Robert Winogrodzki (m), Guðmundur Arnar Hjálmarsson, Almar Daði Jónsson, Javier Angel Del Cueto Chocano, Jesus Guerrero Suarez, Arkadiusz Jan Grzelak, Björgvin Stefán Pétursson, Carlos Carrasco Rodriguez, Kristinn Justiniano Snjólfsson, Hilmar Freyr Bjartþórsson, Unnar Ari Hansson.