„Ég hef hætt nokkrum sinnum," segir Andy og hló. „Þegar ég var 18 ára þá fékk ég ekki nýjan samning hjá Tranmere Rovers og ég hætti þá þar til að ég var næstum 21 árs. Ég byraði þá að leika mér að spila með vinum mínum og í kjölfarið byrjaði ég að spila aftur í neðri deildunum á Englandi. Þá meiddist ég í ökkla og var frá í tvö ár. Mér bauðst síðan að koma til Íslands árið 2006 og ég spilaði með Selfossi þá sem og árið 2007."

Bjó á Ibiza og Tenerife
Andy fór upp úr 2. deildinni með Selfyssingum árið 2007 og bauðst að koma aftur til liðsins í 1. deildina ári síðar. Andy ákvað þá að henda skónum aftur upp á hillu og fara í allt aðra átt.

„Ég ákvað að lifa lífinu og ég bjó á Ibiza og Tenerife í nokkur ár. Ég sé ekki eftir þeim tíma. Það var góður tími í lífi mínu. Þetta hefur líklega lengt ferilinn minn því ég er ennþá að spila í dag. Það er Ibiza að þakka að ferillinn minn varð lengri," segir Andy hlæjandi og bendir á að hann sé í besta formi ferilsins núna.

„Ég er í frábæru formi. Ég missi ekki af æfingum og er laus við meiðsli. Spilamennska mín á Íslandi hefur líklega aldrei verið betri en í fyrra og núna."

„Síðan ég kom aftur til Íslands þá hef ég notið þess að spila fótbolta meira en nokkru sinni áður á ferlinum. Ég er ánægður með að vera ennþá að spila og ég nýt þess meira en nokkru sinni fyrr."

Tók upp þráðinn með Árborg
Eftir dvölina á Ibiza og Tenerife þá var Andy ryðgaður þegar hann tók skóna af hillunni til að leika með Árborg í 2. deildinni sumarið 2011.

„Ég hafði ekki sparkað í bolta í tvö og hálft ár þegar Árborg hafði samband. Það félag var ástæðan fyrir því að ég kom aftur til Íslands. Ég á marga vini hér á Selfossi og núna á ég á fjölskyldu hér. Þetta er mitt annað heimili. Ég fór frá Árborg í Hamar og þaðan fór ég aftur í Selfoss. Það er ólíklegt að ég fari frá Selfossi, það er mitt félag."

Andy er leikmaður umferðarinnar fyrir frammistöðu sína í 4-1 sigri Selfoss á Þór á Akureyri um helgina.

„Það er ekki auðvelt að mæta Þór úti. Flest lið fara þangað með rútu eins og við gerðum. Þeir eru líkamlega sterkir og okkar plan var að standast þeim snúning þar. Við vissum að gæðin í okkar liði myndi sýna sig í lokin. Leikplanið gekk fullkomlega og ég er mjög ánægður með úrsltin," sagði Andy.

Ósáttur með rauða spjaldið
Á lokasekúndunum í leiknum á laugardag fékk Andy rauða spjaldið hjá Sigurður Hirti Þrastarsyni dómara en hann vildi meina að Englendingurinn hefði varið með hendi á marklínu. Andy er því í banni í næsta leik gegn Gróttu.

„Ég er mjög svekktur. Dómarinn hefði átt að sýna meiri reynslu þarna. Ég var með hendina upp við líkamann. Þetta var á 96. mínútu og við vorum 4-1 yfir. Ég er nógu reyndur til að gera ekki neitt heimskulegt í þessari stöðu. Dómarinn á að sjá að þetta er ekki viljandi og að boltinn fór í öxlina á mér. Ég fékk beint rautt, ekki einu sinni annað gult. Ég hef ekki séð þetta aftur á myndbandi en ég er 90% um að þetta var ekki rautt spjald. Réttlætinu var fullnægt þegar þeir klikkuðu á vítinu," sagði Andy en Gunnar Örvar Stefánsson brenndi af spyrnunni.

Andy verður 37 ára síðar á þessu ári en hann ætlar að spila áfram næstu árin.

„Miðað við formið sem ég er í þá er ég ekkert að hugsa um að hætta. Það er engin ástæða til. Vonandi næ ég að spila í nokkur ár í viðbót. Ég er samkeppnishæfur og þá spila ég áfram. Ég ætla samt ekki að spila endalaust og líta heimskulega út á vellinum. Þegar tími minn kemur þá mun ég vita af því en eins og staðan er núna þá er það ekki á næstunni. Ég á vonandi nokkur ár eftir," sagði Andy að lokum.

Sjá einnig:
Bestur í 1. umferð - Andrés Már Jóhannesson (Fylkir)