þri 23. maí 2017 15:00
Magnús Már Einarsson
Sextán spor saumuð í Brynjar - Eins og botox sprauta í neðri vörina
Brynjar Gauti vígalegur eftir leikinn á sunnudaginn.
Brynjar Gauti vígalegur eftir leikinn á sunnudaginn.
Mynd: Úr einkasafni
Brynjar Gauti Guðjónsson, varnarmaður Stjörnunnar, fór beint á sjúkrahús eftir 2-1 sigur liðsins á KA í fyrrakvöld.

Eftir klukkutíma leik skoraði Brynjar mark sem var dæmt af. Á sama tíma lenti hann í samstuði við Elfar Árna Aðalsteinsson leikmann KA og fékk ljótan skurð á vörina.

„Þetta voru sextán spor í allt. Ég fékk gat í gegnum vörina og það þurfti að sauma tíu spor utan á og sex innan á til að loka því," sagði Brynjar við Fótbolta.net í dag.

Brynjar fór í nýja treyju og hélt áfram leik á sunnudag eftir samstuðið.

„Við náðum að stoppa blæðinguna nokkurnveginn. Þetta var aðeins óþægilegt en ekkert þannig að maður þyrfti að fara út af."

Í dag sést vel á Brynjari að hann hafi orðið fyrir hnjaski.

„Ég er stokkbólginn á vörinni í dag og með saumana á hökunni. Það er eins og ég sé nýkominn úr góðri botox sprautu á neðri vörina," sagði Brynjar og hló en hann reiknar með að verða klár í slaginn þegar Stjarnan mætir Fjölni á sunnudag.

„Ég losna við saumana á föstudaginn og ég reikna ekki með að þetta hafi langtíma áhrif."

Hér að neðan má sjá fleiri myndir af því hvernig Brynjar lítur út í dag.
Athugasemdir
banner
banner
banner