óvinur knattspyrnunnar?
Jose Mourinho er harðlega gagnrýndur af Volker Roth formanni dómaranefndar UEFA. Kemur gagnrýnin í kjölfar þess að Anders Frisk ákvað að hætta dómgæslu nú á dögunum í kjölfar hótanna sem hann fékk. Hótanirnar fékk Frisk eftir leik sem hann dæmdi á milli Barcelona og Chelsea. Gengur Roth svo langt að kalla þjálfarann sigursæla "óvin knattspyrnunnar
Roth sagði í samtali við eitt sænsku dagblaðanna að áhrif þjálfara væru gríðarleg. Það eru þjálfararnir sem hafa mest áhrif á stuðningsmennina og koma þeim í þann ham að hóta fólki lífláti. Við getum ekki látið það óáreitt að einn af okkar bestu dómurum neyðist til að hætta vegna þessa. Fólk eins og Mourinho er óvinir knattspyrnunnar."
Félagar Frisk í dómarastéttinni hafa biðlað til UEFA og FIFA að taka harðar á þjálfurum, leikmönnum og öðrum starfsmönnum félaga sem gagnrýna dómara. Einn þeirra er Svisslendingurinn Urs Meier en hann varð einnig fyrir miklu áreiti eftir leik Englands og Portúgals á EM 2004. Fékk meðal annars send mörg þúsund tölvupósta frá bálreiðum stuðningsmönnum Englands. Hann tekur undir gagnrýni Roth.
"Það verður að grípa til frekari aðgerða, ellegar munu sífellt fleiri dómarar verða hraktir úr starfi. Beita verður þá harðari viðurlögum sem grafa undan starfi dómarans.
Tilgangurinn með gagnrýni Mourinho á Frisk var að hafa áhrif á seinni leikinn, en þessi gagnrýni hlýtur að teljast ámælisverð. Frisk er frábær dómari og frábær einstaklingur, einn besti dómari heims undanfarin ár. Yfirlýsingar Mourinho hafa gert Frisk erfitt fyrir og fjölmiðlar og aðrir hafa svo helt olíu á eldinn."
Meier hefur skorað á Frisk að endurskoða ákvörðun sína en segist skilja hana mæta vel. Sjálfur segir Frisk það ekki koma til greina að byrja aftur að dæma, en hann var í öðru sæti á lista yfir bestu dómara í heimi, á eftir Pierluigi Collina.
"Ég mun aldrei dæma aftur. Það sem er búið að gera mér er svo alvarlegt að ég gat ekki ímyndað mér að svona lagað væri til. Maður veit ekki hvað þessir einstaklingar eru færir um að gera og ég hef lifað í ótta um hvað þeir geri börnunum mínum"
Athugasemdir
