„Mér fannst við spila mjög vel í þessum leik. Við sköpuðum okkur góð færi og skoruðum gott mark. Við misstum einbeitinguna í í föstu leikatriði og okkur var refsað. Það er annar leikur eftir og við þurfum að vera klárir á þriðjudaginn, sagði Heimir Guðjónsson þjálfari FH eftir 1-1 jafntefli gegn Víkingi í Götu í forkeppni Meistaradeildarinnar í kvöld.
Lestu um leikinn: FH 1 - 1 Víkingur Götu
„Við náðum ágætis floti á boltann og þeir spila sterkan varnarleik, eru mjög agaðir í sínum leik og eru með góðar skyndisóknir og sterkir í föstum leikatriðum og við klikkuðum einu sinni þar," sagði Heimir sem býst við svipuðum leik þegar liðin mætast í Færeyjum í seinni leiknum.
„Þeir þurfa ekki að breyta miklu. Þeir fengu mikilvægt útivallarmark. Það kæmi mjög á óvart ef þeir myndu breyta leikskipulaginu."
Miðað við leikinn í kvöld, ætti FH að vera í dauðafæri að komast áfram í Meistaradeildinni, því það sást augljóslega að FH er betri knattspyrnulið en það færeyska. Það er hinsvegar ekki alltaf spurt að því.
„Ef við spilum vel á þriðjudaginn eins og við gerðum í kvöld, þá myndi ég segja það jú," sagði Heimir að lokum.
Viðtalið í heild sinni má sjá í sjónvarpinu hér að ofan.
Athugasemdir