Stjarnan gerði sitt fjórða jafntefli í sex leikjum er liðið fékk Grindavík í heimsókn í Pepsi-deild karla í kvöld. Stjarnan er með einn sigur í fyrstu sex leikjunum, en af þessum sex leikjum hafa fimm þeirra verið heimaleikir. Þetta gæti orðið dýrt þegar líður á mótið.

Stjarnan fékk Grindavík í heimsókn í Garðabæinn í kvöld og lenti undir á 32. mínútu þegar Færeyingurinn Rene Joensen skoraði. Markið kom gegn gangi leiksins, en Stjörnumenn höfðu verið betri.

Stjörnumenn voru sterkari aðilinn í fyrri hálfleik en vörn Grindvíkinga stóð vel að venju.

Tölfræði fyrri hálfleiksins:
Marktilraunir: Stjarnan 13 - 3 Grindavík
Skot á markið: Stjarnan 3 - 2 Grindavík
Hornspyrnur: Stjarnan 8 - 2 Grindavík

Stjarnan hélt áfram sinni pressu í seinni hálfleik en náði ekki að skora fyrr en á 79. mínútu. Markið gerði varamaðurinn Guðmundur Steinn Hafsteinsson eftir hraða sókn.

Markið var verðskuldað, en meira var það ekki. Grindvíkingarnir eflaust sáttari við stigið en Stjörnumenn.

Grindavík er með 11 stig eftir sex umferðir en Stjarnan sjö stig. Stjarnan hefur lokið fimm heimaleikjum og einungis náð í einn sigur eins og segir hér að ofan.

Síðasti leikur kvöldsins er í gangi. Smelltu hér til að fara í beina textalýsingu frá leik Vals og Breiðabliks.