Heimir Hallgrímsson.
Guðni Bergsson, formaður KSÍ, er bjartsýnn á að Heimir Hallgrímsson framlengi samning sinn eftir HM í Rússlandi. Heimir verður samningslaus eftir HM en hann ætlar þá að skoða hvaða möguleikar verða í boði.
„Við höfum ekkert rætt saman nýverið. Núna erum við bara að fókusa á HM," sagði Guðni fyrir æfingu landsliðsins í Gelendzhik í dag.
„Við höfum rætt málin oftar en einu sinni, ég og Heimir. Það er góður skilningur okkar á milli. Ég hef skilning á hans stöðu og hann okkar."
„Ég er bjartsýnn á það að við náum saman eftir mót en við erum ekki ein með þessa ákvörðun hjá KSÍ. Þetta er líka ákvörðun Heimis og þetta veltur líka á ytri aðstæðum, hvort hann fái mögulega mjög spennandi tilboð."
Guðni segist vera tilbúinn með plan B ef Heimir ákveður að róa á önnur mið.
„Við erum með plan B og C. Við erum búin að hugsa um það eðlilega. Við tökumst á við það ef þörf krefur," sagði Guðni.
Athugasemdir
