Höttur úr þriðju deild vann óvæntan stórsigur á Huginn úr annarri deild í æfingaleik á grasinu á Eiðum í morgun. Talsvert vantaði í bæði lið en þó voru þeir Óliver Ingvarsson markmaður í Hetti og Tim Smith markvörður frá Bandaríkjunum og Tómas Arnar Emilsson í Huginn að leika sína fyrstu leiki í ár með liðunum.

Höttur stillti upp átta leikmönnum á 2.flokksaldri í byrjunarliði en Birgir Hákon Jóhannsson skoraði þrennu fyrir þá, Högni Helgason tvö, Ívar Karl Hafliðason 1 og þá brá Halldór Skarphéðinsson varamarkvörður sér í sóknina í síðari hálfleik og gerði sér lítið fyrir og skoraði 2 mörk, þar af annað með glæsilegum flugskalla í stöng og inn.

Ýmir sigraði ÍH 4-1 í æfingaleik á Ásvöllum. Eiríkur Einarsson skoraði fyrir ÍH en Birkir Ingibjartsson, Úlfar Freyr Jóhannsson, Jóhannes Hauksson og Joaquin Páll Palomares fyrir Ými.

Varalið Víkings Ólafsvíkur og ÍR mættust á Hellissandi í gær og sigraði ÍR 8-6 í miklum markaleik. Jónas Gestur Jónasson gerði tvö fyrir Víking og þeir Fannar Hilmarsson, Jón Steinar Ólafsson, Slavisa Mitic, og Predrag Milosavljevic gerðu allir eitt. Hjá ÍR skoraði Árni Jón Baldursson þrennu, Guðmundur Pétursson tvö mörk sem komu bæði úr vítum á fyrstu 20 mínútum leiksins og þá gerðu Gunnar Reynir Steinarsson og Benedikt Bjarnason sitt markið hvor auk þess sem eitt markanna var sjálfsmark.