Fótbolti.net ætlar að fjalla vel um aðra deildina í sumar eins og undanfarin ár og við ætlum að hita vel upp með því að birta spá fyrirliða og þjálfara í deildinni fram að móti.
Við fengum alla fyrirliða og þjálfara til að spá og fengu liðin því stig frá 1-9 eftir því en ekki var hægt að spá fyrir sínu eigin liði. Í sjötta sætinu í þessari spá var KS/Leiftur sem fékk 83 stig af 162 mögulegum eða fjórum stigum meira en Völsungur sem endaði í sjöunda sætinu. Kíkjum á umfjöllun okkar um KS/Leiftur.
KS/Leiftur
Þjálfari: Marko Tanasic
Búningar: Gul treyja, grænar buxur, sokkar.
Heimasíða: http://www.siglo.is/ks og http://www.leiftur.is
Það sem mest hefur komið á óvart við hið nýja lið er það að liðið hefur alls ekki verið duglegt að sækja leikmenn fyrir komandi tímabil. Til að mynda vann KS 2.deildina árið 2004 en liðið hafði ekki erindi sem erfiði í 1.deild í fyrra og féll aftur. Þeir leikmenn sem liðið hefur misst, eru ekki af lakari endanum. Liðið missti einn af sínum máttarstólpum sem er uppalinn hjá KS, Þórð Birgisson, sem ákvað að ganga í raðir HK síðastliðið haust. Ofan á það er óvíst hvort Serbarnir þrír sem léku með KS í fyrra, komi aftur fyrir þetta tímabil. Þar munar mikið um Branislav Zrnic sem var einn allra besti leikmaður 2.deildar árið 2004 og þá tekur Bryjnar Harðarson sér frí eftir að hafa slitið krossbönd og tvö liðbönd í leik gegn Haukum í fyrra. Til þess að skerpa varnarleik liðsins fékk liðið hins vegar Sandor Zoltan Forizs frá KA en hann er alls ekki ókunnugur þeim
Ólafsfirðingum. Hann lék með Leiftri/Dalvík í tvö ár áður en hann
gekk í raðir KA. Það verður að teljast afar einkennilegt að KA skuli
ekki hafa reynt að halda þessum sterka varnarmanni miðað við
ástandið sem ríkir hjá liðinu.
Margir bíða spenntir eftir að sjá hvernig samstarfið hjá þessum tveimur liðum á eftir að takast til, illa tókst hjá Leiftri og Dalvík en því eru margir á því að samstarfið eigi ekki eftir að verða svo farsælt. Hins vegar er ljóst að þetta samstarf lyktar mun betur en það sem átti sér stað hjá Leiftri/Dalvík. Samheldnin virðist vera mun meiri meðal bæjarbúa og einnig meðal leikmanna. Það virðist sem svo að leikmenn liðanna finni sig betur saman og séu tilbúnir að vinna saman sem eitt lið til að ná árangri. Margir leikmanna KS hafa verið lengi saman og ljóst er að reynsla þeirra mun vega þungt í sumar í þessari erfiðu landsbyggðardeild.
Veikleikar: Miðað við hvaða mannskap liðið hefur þá má telja að varnarleikur liðsins sé þeirra veikasti hlekkur eins og staðan er í dag. Þrátt fyrir að liðið hafi fengið Sandor Forizs frá KA er ljóst að varnarlínan sem slík er ekki nægilega sterk. Það verður gaman að fylgjast með því hvernig Sandor tekst að binda saman vörnina en það mun einnig mæða mikið á Stefáni Loga Magnússyni á milli stanganna. Það á svo eftir að koma í ljós hvort samstarfið verði ákveðinn veikleiki. Ná bæjarfélögin að halda stemningu og lífi í samstarfinu og ef það tekst, er ljóst að samstarfið getur orðið farsælt til lengri tíma.
Lykilmenn: Stefán Logi Magnússon, Sandor Zoltan Forizs og Ragnar Hauksson.
Komnir: Sandor Zoltan Forizs frá KA.
Farnir: Árni Kristinn Skaftason í Þór, Þórður Birgisson í HK, Branislav Zrnic til Serbíu og Svartfjallalands, Aleksandar Lazarevic til Serbíu og Svartfjallalands, Sasa Vonjic Zelic til Serbíu og Svartfjallalands, Brynjar Harðarson tekur frí vegna meiðsla.
Spá fyrirliða og þjálfara:
1. ?
2. ?
3. ?
4. ?
5. ?
6. KS/Leiftur 83 stig
7. Völsungur 79 stig
8. Reynir Sandgerði 53 stig
9. Sindri 43 stig
Athugasemdir
