Umboðsmaður Zinedine Zidane sagði í dag að franski landsliðsfyrirliðinn hafi skallað Marco Materazzi varnarmann Ítalíu í úrslitaleik Heimsemistaramótsins í gær því sá ítalski hafi sagt eitthvað mjög alvarlegt.
Zidane virtist hafa brugðist við einhverju sem hann sagði og var rekinn af velli fyrir að skalla hann af fullu afli í brjóstkassann.
,,Hann sagði mér að Materazzi hafi sagt eitthvað mjög alvarlegt við hann en hann vildi ekki segja mér hvað," sagði Alain Migliaccio umboðsmaður Zidane við BBC.
Samkvæmt fréttum í Frakklandi er talið að Materazzi hafi móðgað móður Zidane en Migliaccio sem talaði við Zidane klukkan 2 í nótt sagði að hann hafi ekki viljað segja sér hvað Materazzi sagði.
,,Ég veit ekki, Zidane vildi ekki tala um það en hann mun tala um það á næstu dögum. Hann er maður sem venjulega lætur allt yfir sig ganga en á sunnudagskvöld sprakk eitthvað innra með honum. Hann er mjög vonsvikinn og dapur. Hann vildi ekki ljúka þessu svona."
Athugasemdir
